Хөкүмәт 2035 елга кадәр газ-мотор ягулыгы базарын үстерү концепциясен раслады
Газ-мотор ягулыгын кулланучы транспорт чараларының санын арттыру, заманча ягулык салу һәм сервис инфраструктурасын булдыру, экологик хәлне яхшырту - бу һәм башка бурычлар 2035 елга кадәр газ мотор ягулыгы базарын үстерү концепциясе нигезенә ятты. Аны үз боерыгы белән Хөкүмәт Рәисе Михаил Мишустин раслады.
Концепциягә транспорт чараларының һәм техникасының сигез сегменты кертелгән, аларны газ-мотор ягулыгына күчерү сизелерлек икътисадый һәм экологик эффектка ия булачак, шулай ук парник газлары чыгарып ташлауларының шактый кимүенә китерәчәк. Болар - автомобиль, диңгез һәм эчке су транспорты, тимер юл транспорты, авыл хуҗалыгы техникасы һәм җиһазлары, коммуналь һәм юл-төзелеш техникасы, карьера һәм тау эшкәртмәләрендә эшләр башкару өчен билгеләнгән махсус җайланмалар.
Концепциягә 2035 елга кадәр үзебезнең газ-мотор ягулыгы базарын үстерүнең ике сценарие салынган. Төп сценарий дөнья энергетика базарларында тышкы каршылыкларны һәм тотрыксызлыкны исәпкә алып формалаштырылган. Максатчан рәвештә газ-мотор ягулыгы базары тизләтелгән темплар белән үсәчәк уңай шартларны күздә тота.
Шулай итеп, база сценариенда 347,3 мең һәм газ-мотор ягулыгын кулланучы 369,5 мең автотранспорт чарасы җитештерү күздә тотыла. Моннан тыш, ул 80 граждан судносы төзүне, шулай ук 113 магистраль һәм маневр локомотивлары чыгаруны, 4 мең берәмлек авыл хуҗалыгы һәм 1,6 мең берәмлек карьера техникасы һәм җиһазлар, 2,5 мең берәмлек коммуналь һәм юл-төзелеш техникасы чыгаруны күздә тота. Бу планнарны гамәлгә ашыру Россиядә газ-мотор ягулыгын куллануның күләмен 2024 елда 2,52 млрд кубометрдан 2035 елда 9,6 млрд кубометрга кадәр арттырырга мөмкинлек бирәчәк.
Төп сценарийны гамәлгә ашырганда газ-мотор ягулыгының ягулык салу инфраструктурасы объектлары саны 1170 тән 2213 берәмлеккә кадәр артырга тиеш.
Максатчан сценарийда газ-мотор ягулыгында эшләүче 528 мең автотранспорт чарасы җитештерү һәм аны файдалануга 525 мең берәмлек автотранспорт тапшыру күздә тотыла. Ул шулай ук 107 граждан судносы төзүне, 149 магистраль һәм маневр локомотивы, 2,9 мең берәмлек карьера техникасы, 18,7 мең берәмлек авыл хуҗалыгы техникасы һәм җайланмалары, 3,8 мең берәмлек коммуналь һәм юл-төзелеш техникасы чыгаруны күздә тота. Бу 2035 елда газ-мотор ягулыгын куллануны 13,9 млрд кубометрга кадәр арттырырга мөмкинлек бирәчәк.
Газ-мотор ягулыгының ягулык салу инфраструктурасы объектлары саны 2715 берәмлеккә кадәр артачак.
"Президент безнең ил өчен газ-мотор ягулыгын куллануның өстенлекле булуын ассызыклады", - дип искәртте Михаил Мишустин 8 сентябрьдәге вице-премьерлар белән киңәшмәдә.
Аның сүзләренчә, концепциядә каралган барлык чаралар табигый газга эчке ихтыяҗны киңәйтергә һәм икътисадның яңа сегментын булдыруны тизләтергә мөмкинлек бирәчәк.
Фото: Россия хөкүмәте